Unau is your digital destination for celebrating the essence of brotherhood across the Kuki, Mizo, Zomi, and Hmar tribes.
Key: Doh is ‘Eb’
Rauthlain ka fang vel chung vankhua nuam khi,
Chutah lungduh kal ta ka han hmu a;
An leng dial e, Angel dungthulin,
He lei hringnun reng hi an ngai tawh lo.
Chorus:
Aw a va mawi em ve, ka sawi thei lo,
Hringmi ânka hian a hril zo lo;
Tual an lenna rangka dâr luan nen,
A laiah nunna tui a luang del e.
Chu nunna lui kam hmun hring nuam cham diaiah,
A par vul mawi ngei nunna siahthing chu;
Hawi vel ila, engmawi a zam vel,
Thianghlimna leh mawi tin a kim ngei e.
Hlimna êng a kai chiai an sakhmelah chuan,
Hmangaih khat liam par tlanin an leng e;
Van mi zaipawl, mawi tawpin an zai,
Van khua a nghawr vel an fak zai ri chuan.
He lei ram ka zin kawng hi ka pelh hun chuan,
Chu ram mawiah hlimten ka leng ve ang:
Van mi zaipawl fak hla zawm vein,
Tlantu kiangah ka chawl kumkhua tawh ang.
Composer: Dr. Ramdinthara Sailo
