Unau is your digital destination for celebrating the essence of brotherhood across the Kuki, Mizo, Zomi, and Hmar tribes.
Lalpa, i khawngaihna,
Lalpa, i khawngaihna chuan,
Kei mi sual hi min huam ve em? hmmm…
Lalpa, i khawngaihna,
Lalpa, i khawngaihna chuan,
Kei mi sual hi min huam ve em? hmmm…
Ka au che, Lalpa,
Ka lei hringnun hi a ral hunin,
Min lo kai angem?
Ka thlarau riangvai hian,
Thihna Jordan lui a dai hunin….
Aw, i thiltihtheihna kut chak chuan,
Min lo kai angem?
Keimah mai chuan,
Ka dai ngam dawn si lo.
Lalpa, i hmangaihna,
Lalpa, i hmangaihna chuan,
Kei mi sual hi min pawm angem? hmmm..
Lalpa, i hmangaihna,
Lalpa, i hmangaihna chuan,
Kei mi sual hi min pawm angem? hmmm..
Lalpa, i thiltihtheihna,
Lalpa, i thiltihtheihna chuan,
Kei mi sual hi min siam thar rawh…hmm
Lalpa, i thiltihtheihna,
Lalpa, i thiltihtheihna chuan,
Kei mi sual hi min siam thar rawh…hmm
MIN LO KAI ANG EM
Composer: Joseph Zaihmingthanga
Popularized by: Joseph Zaihmingthanga, Jonathan Lianhna
JOSEPH ZAIHMINGTHANGA KAN THEN TAK
9th May 2023: A vanglaia Zoram dengchhuak thei khawpa zaithiam lar leh huhang ngah, a zai dan leh style danglam tak avanga mite chhinchhiah rawn Joseph Zaihmingthanga chu nimin khan Ramhlun Indoor Stadium-ah vui liam a ni ta.
Joseph-a hi a naupan lai aṭanga zai ngaina mi a ni a, naupang Sunday School leh Primary School a kal phat aṭanga solo ṭhin a ni. “Tahchuan a leng” tih hla a sak aṭangin mi nawlpuiin kan hre ṭan a, lengzem leh lenglawng hla sa thiam bik a ni a, kar loah Zoram mipuite ngainat rawn a rawn ni thei.
Mimal anga a zai hnuah Vanlalsailova leh Robert Lalduhzuala-te nen Super Trio an din a, a hunlaia an lar dan kha pui tak a ni a, vawiin thlenga Trio lar ber ti ila kan sawisual awm lo e.
Joseph-a hian album pali tichhuak tawhin, a zai thiam mai a ni lo a, hla phuah thiam tak a ni tel. Music video tam tak a siam hman a, hla ṭha tak tak min hnutchhiah bawk avangin a sulhnu hi Zofa thlah kal zel tan a la hlu tial tial dawn a ni.
“Zaithiam lar tih aiin Pathian thusawi ṭhin tiha hriat ka duh zawk”
Kum 2005 khan a nun pum Pathian rawngbawl turin a inhlan a, rawngbawltu hrang hrangte ṭawiawmin hun a hmang ṭan. Gospel Thunder Team soloist rinrawl ber a ni ṭhin.
Thusawi rawngbawlna lamah ‘Sons of God’ team-ah Deputy Speaker a awmin a rawngbawlna bul a ṭan. October, 2010 khan member pahnih khat lek te nen ‘Krista Sipaite Team’ an din a, Home Crusade neiin Zoram hmun hrang hrangah a fehchhuak zui a, mimal mangang ten an ko chamchi ṭhin. Kum 2014 khan, Synod Revival Speaker ni tura lak a lo ni ta hial a, Kohhran mal, KṬP leh Bial hming pawha rawngbawl tura sawm hlawh ber pawl a ni ṭhin.
“Rawngbawl tura koh ka ni a, a hmun leh a biak danah ka buai a thiang lo a, rawngbawlna tur hun leh hmun ka neih chuan ka bawl miah miah mai ang. Zaithiam lar tia mi min hriat ai chuan Pathian thusawi ṭhin tia mi min hriat hi ka duh zawk,” tiin rawngbawlna ngai pawimawh tak mi a ni.
“Pianpui unau ang maia ka en, ka unaupa in min kalsan thut mai hian min ṭhawng tak zet a, ka na a… ka sun tak zet a ni. Kan chanchin hi sawi dawn ila nileng pawh hian a daih dawn lo. Tuna Zaia thlahna sawi a ṭul pawh hi hriatthiam har ka ti a, a mak a ni tawp mai a ni. Lungngaih leh lawmni kan lo paltlang za a, harsatnaah kan inpui tawn a, dinsak kan ngaihnaah tlanchhe loin kan in dinsak ṭhin. Kan zaihona piahlamah inlaichinna thuk tak Lalpan min pe a, chu chu kan lawmna a ni ṭhin.
A hun hnuhnung a thih dawn darkarah pawh a mamawh te tan counselling neiin ṭawngṭaina te ala hmansak a, tichuan a tlu ta kha a ni a, ka unaupa hian a rawngbawl hna a hlen zo hle in ka hria. Van pawhin ropui taka an lo lawm luh ngei ka ring. Ka unaupa, ka ṭhianpa ka ngaih em em leh ka nuna mi pawimawh ber zinga mi chuan min lo kalsan dawn ta a, Amah awm tawh lo mah se s fate tan pa kan la awm ve reng dawn a, ani erawh luiralah Lalpa fak ho turin kan la tawk leh ngei ang… Mangtha le Zai…”
– Robert Lalduhzuala
