Unau is your digital destination for celebrating the essence of brotherhood across the Kuki, Mizo, Zomi, and Hmar tribes.
Hlauhna leh lungngaihna ten,
Ka nun min chim lai leh,
Buaina leh manganna te
lo thleng thin mahsela,
Heng hian min hrilh nawn thin,
Hun harsa ah pawh min awmpui,
Min chelh reng thin,
Min thlahthlam phallo lalpa’n.
Engkim hian min hmangaih zia
min hrilh nawn thin,
Hun harsa pawh tawk thin mah ila,
A remruat ril ropui zia an puang thin
hun thim ber pawn,
A tawpah chuan lalpa a tha.
Ka dinhmun ka ngaihtuahin,
Vanduai bika in hriain,
Dam pawh thlakhlelh lohna leh,
Nun beidawnga rum lai pawn,
Hmangaihtu lalpa erawh
ka lakah a beidawng ngai lo,
Min thlahthlam lo,
A hmangaih hi min kalsan lo.
Engkim hian min hmangaih zia
min hrilh nawn thin,
Hun harsa pawh tawk thin mah ila,
A remruat ril ropui zia an puang thin
hun thim ber pawn,
A tawpah chuan lalpa a tha.
LALPA A THA
Composer: Jonathan Lianhna
Popularized by Jonathan Lianhna
LALPA A THA THUHMA
He hla hi 2021 August thla a Lalpa min pek a ni a, thlir leh ngaihthlak theiha a awm hi ka lawm hle mai.. Lalpa hi a tha a ni.
Khawvel kan awm chhung hian buaina leh harsatna te, hlauhna leh manganna te kan tawh ni a lo thleng leh thin a, kan la tawng fo dawn pawhin a lang, khawvelah kan la awm miau si a. Mahse heng harsatna leh buaina te, hlauhna leh manganna te a lo thlen chang apianga ka lawmna ti zual thintu chu, keini ringtute hi chu hun harsa a min awmpui tlat thintu kan nei hi a ni. Mahni chauha paltlang theihloh thil kan tawn chang apiangin min paltlang pui thintu Lalpa hi a lian êm a, chakna nilovin, thil tih theihna ni hek lovin, Pathian thlarau avang zawkin kan lo paltlang thei leh chauh thin hi a lo ni a, chung zawng zawng kan han paltlang zo chiah chu a tawpah chuan ‘Lalpa hi a tha a ni’ kan lo ti leh vawng vawng thin.
He hla ngaithlatu zawng zawngte Lalpa that zia kan fiah thar leh theuh theihna turin Lalpa’n malsawm vek che u rawh se🙏🏻
He Video a puitlin theihna tura min puitu zawng zawng chungah lawmthu ka sawi e.
He hla kaltlanga Lalpa’n ngaithlatute nunah hna a thawh hi ka van duh êm.. ka duh tak zet a ni. Nun beidawng tak tak, dam pawh thlahlel tawhlo, nun awmze nei tawhlote hnenah he hla tlâwm tak hi thleng sela, kan beidawnna hmunah Lalpa hi a beidawng ve ngailo a, kan hlauh leh mangan, kan buai leh lungngaihna hmunah te hian Lalpa’n min awmpui zel a ni tih hi an hriat thar leh theihna hla lo ni se ka duh takzet a ni.
– Jonathan Lianhna
